وزیراعظم عمران خان کی زراعتی شعبے کی ترقی کے لئے چینی جدّت پسند زراعتی تجربات سے استفادہ کرنے کی اہمیت پر زور۔۔۔۔۔

وزیراعظم پاکستان عمران خان نے کہا ہے کہ پاکستان چین کی جدّت پسند زراعتی تجربات سے استفادہ حاصل کرکے نہ صرف خاطر خواہ فوائد حاصل کر سکتا ہے بلکہ زراعتی شعبے میں ایک انقلاب برپا کر سکتا ہے۔تفصیلات کے مطابق وزیر اعظم پاکستان کا وفاقی وزیر نیشنل فوڈ سیکیورٹی اینڈ ریسرچ مخدوم خسرو بختیار سے تبادلہ خیال کرتے ہوئے مزید کہنا تھا کہ پاکستان کا زراعتی شعبہ ملکی شرح نمو کا ایک اہم حصہ ہے اور یہ شعبہ 50 فیصد لیبر فورس بھی مہیا کر رہا ہے۔واضح رہے کہ وفاقی وزیر نیشنل فوڈ سیکیورٹی اینڈ ریسرچ مخدوم خسرو بختیار نے حال ہی میں اس وزارت کی باگ دوڑ سنبھالی ہے جبکہ ماضی میں انہوں نے وفاقی وزیر منصوبہ بندی و ترقی کے طور پر اپنی خدمات سر انجام دے چکے ہیں۔ اس موقع پر وزیر اعظم عمران خان نے سی پیک منصوبہ کے پراجیکٹس کو ترقی کی راہ پر گامزن کرنے میں مخدوم خسرو بختیار کے کردار کو شاندار الفاظ میں سراہا۔